இலக்கணம் கற்போம்

இதழ் - 70                                                                                        இதழ் - ௭0

நாள் : 27-08-2023                                                                         நாள் : ௨௭-0அ-௨௦௨௩

 

 

பதம்

பதம்

    பதம் என்பதற்கு சொல் என்று பொருள். பதம்  ஒன்று அல்லது அதற்கு மேற்பட்ட எழுத்துகள் சேர்ந்து ஒரு பொருள் தந்தால் அது பதம் எனப்படும். 

 

வகைகள்
    பதம் இரண்டு வகைப்படும். அவையாவன,

• பகாப்பதம் - பகா என்றால் பிரிக்க இயலாதது என்று பொருள்படும்.
• பகுபதம் - பகுத்தல் என்றால் பிரித்தல் என்பது பொருளாகும்.
  

பகாப்பதம்
பிரிக்க இயலாத, பிரித்தால் பொருள் தராத சொல் பகாப்பதம் எனப்படும்.
 

சான்று

• நிலம்
• நட
• மற்று
• உறு

        பகுப்பாற் பயனற் றிடுகுறி யாகி
        முன்னே யொன்றாய் முடித்தியல் கின்ற
        பெயர்வினை யிடையுரி நான்கும் பகாப்பதம்.”
                                                                (நன்நூல், நூற்பா. எண். 131)

 

பகாப்பதம் இரண்டு எழுத்து முதல் ஏழு எழுத்துகள் வரை அமையும்.

• உண்        -     இரண்டெழுத்துப் பகாப்பதம்
• நிலம்           -    மூன்றெழுத்துப் பகாப்பதம்
• நெருப்பு        -    நான்கெழுத்துப் பகாப்பதம்
• பெருமிதம்       -    ஐந்தெழுத்துப் பகாப்பதம்
• குங்கிலியம்       -    ஆறெழுத்துப் பகாப்பதம்
• உத்திரட்டாதி      -     ஏழு எழுத்துப் பகாப்பதம்

 

பகாப்பதம் நான்கு வகைப்படும்.

• பெயர்ப் பகாப்பதம்
• வினைப் பகாப்பதம்
• இடைப் பகாப்பதம்
• உரிப் பகாப்பதம்

சான்று

• கல், நீர், பெண்        -      பெயர்ப் பகாப்பதம்
• வா, சொல், பார்         -    வினைப் பகாப்பதம்
• போல், கொல், மன்    -     இடைப் பகாப்பதம்
• நனி, தவ, உறு         -    உரிப் பாகப்பதம்

 

    தமிழ்மொழியின் இனிய இலக்கணப் பாங்கினை வரும் வாரங்களில் மேலும் அறியலாம்...

 

திருமதி. தி.செ. மகேஸ்வரி

தமிழாசிரியர்

ஸ்ரீராமகிருஷ்ண மிஷன் வித்யாலய 

சுவாமி சிவானந்தா மேல்நிலைப்பள்ளி 

கோயம்புத்தூர்-641020