இதழ் - 65 இதழ் - ௬௫
நாள் : 23-07-2023 நாள் : ௨௩-0௭-௨௦௨௩ 
உம்மை இடைச்சொல்
- உம் என்னும் இடைச்சொல் எட்டுப்பொருள்களில் வரும்.
- எதிர்மறை, சிறப்பு, ஐயம், எச்சம், முற்று, எண், தெரிநிலை, ஆக்கம் என்பனவாகும்.
- இதில், உம்மை என்பதில் உள்ள ‘ஐ’ சாரியை ஆகும்.
“எதிர்மறை சிறப்பு ஐயம் எச்சம் முற்று அளவை
தெரிநிலை யாக்கமோடு உம்மை யெட்டே.”
( நன்னூல், நூற்பா எண். 425 )
சான்று
சான்று
- குரங்கும் ஏற முடியாத மரம் - உம் உயர்வு சிறப்பும்மை
- நாயும் தின்னாத உணவு - இழிவு சிறப்பும்மை
- பத்தாயினும் எட்டாயினும் கொடு - ஐயவும்மை
- அவள் வந்தாலும் வருவாள் - எதிர்மறை உம்மை.
- நீயும் போ, நானும் வருகிறேன் - நீயும் என்பதில் உள்ள உம்மை எதிரே உள்ள நானும் என்பதைத் தழுவி நிற்கிறது. ஆதலால் இஃது எதிரது தழுவிய எச்ச உம்மை.
- நானும் என்பதிலுள்ள உம்மை முன்னே உள்ள அஃதாவது இறந்ததாக உள்ள நீயும் என்பதைத் தழுவி நிற்பதால், இஃது இறந்தது தழுவிய எச்ச உம்மை.
சான்று
- இருகண்களும் சிவந்தன - முற்றும்மை
- பாம்பும் அன்று கயிறும் அன்று - தெரிநிலை உம்மை
- பால் மருந்தும் ஆயிற்று - ஆக்கவும்மை
- அண்ணனும் தம்பியும் வந்தார்கள் - எண்ணும்மை
இவ்வாறு தமிழ்மொழியின் இனிய இலக்கணப் பாங்கினை வரும் வாரங்களில் மேலும் அறியலாம்.
தி. செ. மகேஸ்வரி
தமிழாசிரியர்
ஸ்ரீராமகிருஷ்ண மிஷன் வித்யாலய
சுவாமி சிவானந்தா மேல்நிலைப்பள்ளி
கோயம்புத்தூர்-641020
No comments:
Post a Comment