இதழ் - 91 இதழ் - ௯௧
நாள் : 21-01-2024 நாள் : ௨௧-0௧-௨௦௨௪
பல, சில புணர்ச்சி
பல, சில புணர்ச்சி
- பல, சில என்னும் சொற்களுக்கு முன் அதே சொற்கள் வந்து புணரும் போது இயல்பாக அப்படியே வருதல் உண்டு. வல்லினம் மிகுந்து வருதலும் உண்டு.
சான்று (இயல்பாக)
- பல + பல = பலபல
- சில + சில = சிலசில
சான்று (வல்லினம் மிகும்போது)
- பல + பல = பலப்பல
- சில + சில = சிலச்சில
அகரம் ஏக “ல“கரம் “ற“கரம் ஆகலும்
- நிலைமொழி இறுதியில் உள்ள அகரம் கெட எஞ்சி நிற்கும் லகரம் றகரமாகத் திரிந்து புணரும்.
சான்று
- பல + பல - ப(ல் + அ) + பல = பற்பல
- சில + சில - சி(ல் + அ) + சில = சிற்சில
பல மற்றும் சில ஆகிய சொற்களின் பின் வேறு சொற்கள் வந்தால் இயல்பாகவும் புணரும் நிலைமொழி ஈற்று அகரம் கெட்டு புணர்வதும் உண்டு.
சான்று (இயல்பாக)
- பல + கலை = பலகலை
- சில + வளை = சிலவளை
சான்று
- பல + கலை = பல்கலை
- சில + வளை = சில்வளை
என நிலைமொழி ஈற்று அகரம் நீக்கப்பட்டும் வரும்.
"பிறவரின் அகரம் விகற்பம் ஆகலும் உளபிற"
பல சில என்னும் சொற்கள் முன் பிற சொற்கள் வந்து புணரின் நிலைமொழி இறுதி அகரம் கெட்டும் புணரும்: கெடாமலும் புணரும்.
சான்று
- பல + மலர் = பன்மலர்
- சில + அணி = சில்லணி
- பல + நலம் = பன்னலம்
- பல + நாடு = பன்னாடு
“பல சில எனுமிவை தம்முன் தாம்வரின்
இயல்பும் மிகலும் அகரம் ஏக
லகரம் றகரம் ஆகலும் பிறவரின்
அகரம் விகற்பம் ஆகலும் உளபிற”
- நன்னூல். நூற்பா. எண் 170
தமிழ்மொழியின் இனிய இலக்கணப் பாங்கினை வரும் வாரங்களில் மேலும் அறியலாம்...
திருமதி. தி.செ. மகேஸ்வரி
தமிழாசிரியர்
ஸ்ரீராமகிருஷ்ண மிஷன் வித்யாலய
சுவாமி சிவானந்தா மேல்நிலைப்பள்ளி
கோயம்புத்தூர்-641020
No comments:
Post a Comment